Segundo a Concellería de Benestar Social, Muller e Familia, “unha sociedade democrática, na que a igualdade sexa real e efectiva, non pode permitir que pesen sobre as mulleres as consecuencias da dobre xornada de traballo (na casa e fóra), como ata agora ven sucedendo”. Para tentar erradicar esta situación púxose en marcha esta actividade, que terá lugar o vindeiro 30 de abril, de 17 a 22 horas, no CEIP Mato Vizoso.

O Obradoiro consta de dúas partes. A teórica consistirá nunha presentación na que o alumnado opinará sobre os contidos aportados, para logo debater sobre os seus costumes sociais con respecto as tarefas domésticas, hábitos alimenticios, etc. A práctica, de tres horas de duración, terá lugar nunha cociña, na que os rapaces e as rapazas elaborarán un menú de tres pratos: primeiro, segundo e postre, coma se fosen adolescentes “parcialmente” emancipados, concienciándoos da dificultade de conciliar a vida familiar e laboral. Aquí traballarán en grupo, e encargarase cada un deles de organizar, elaborar, presentar, degustar, recoller e limpar cada unha das receitas propostas.

A inscrición é totalmente gratuíta e as persoas interesadas poden matricularse, de forma persoal, no Centro de Información ás Mulleres do Concello, ou ben no teléfono 982 52 30 32.