En A obra dramática de Roberto Vidal Bolaño, libro editado por Laiovento, Xosé Manuel Fernández Castro, sintetiza a tese doutoral homónima que defendeu en 2007 na Universidade da Coruña. Este traballo divulgativo pretende ofrecer unha visión de conxunto da vida, obra e pensamento do dramaturgo.

O volume iníciase reivindicando o valor de Vidal Bolaño e reconstruíndo a súa carreira para logo catalogar e clasificar as súas obras, avanzando unha lectura temática dos proxectos en que empeñou a vida. A parte máis extensa do traballo ocúpaa o estudo da peza Agasallo de sombras, estreada en Vigo en 1984 e considerada a “primeira gran superprodución do teatro galego”. O libro complétase cunha extensa bibliografía e un índice onomástico.