A xuventude beneficíase das vantaxes do carné xove

A xuventude beneficíase das vantaxes do carné xove

26 de Xaneiro, 2011 - 12:00 h. | Publicada por Radio Ordes

A Oficina Municipal de Información Xuvenil (OMIX) do Concello de Ordes tramitou un total de 76 carnés xoves durante o ano 2010. Uns carnés que se suman aos tramitados dende a posta en marcha da Oficina e que suman xa un total de preto de 300. Estes carnés, promovidos pola Xunta de Galicia, dirixidos a mozos e mozas de ata 30 anos, proporcionan unha serie de vantaxes como descontos en determinadas tendas e centros de diversa índole de todo o territorio galego.

Durante o ano 2008, ano no que se puxo en marcha a OMIX de Ordes, tramitáronse un total de 139 carnés xoves, aos que se sumaron outros 57 durante o 2009, outros 76 en 2010 e aos que tamén se poden engadir xa outros 14 tramitados durante este primeiro mes de 2011.

Todos aqueles mozos e mozas do municipio de entre 12 e 30 anos que estean interesados en obter o carné xove poden dirixirse á Oficina Municipal de Información Xuvenil do Concello de Ordes, onde deberán cubrir o impreso de solicitude e as taxas que marca a Xunta, así como presentar o seu DNI. 

Ademais da tramitación do carné xove, a OMIX de Ordes tamén ofrece todo tipo de información acerca de actividades das diferentes administracións dirixidas á mocidade, así como de becas dos diferentes organismos, intentando cubrir desta maneira as necesidades informativas dos mozos e mozas ordenses. 

A Oficina Municipal de Información Xuvenil de Ordes está ubicada na planta baixa da Casa do Concello e aberta ao público de luns a venres de 9 a 14:30 horas.

Sociedade