Para seren considerados as estrelas de rock de hogano, a maioría dos divos do balón son moi pacatos. A nómina de verdadeiros transgresores é tan exigua como a das estrelas da música que viviron veloces e se queimaron máis rápido aínda: George Best, Mágico González, Diego Tristán e, arestora, o sueco rebelde. Ninguén dixo que o fútbol tivese que ser un mosteiro, e os catro dianteiros da apocalipse non naceron para arciprestes. Se cadra por iso Ibrahimovic tivo difícil encaixe nun coro tan anxelical e disciplinado como o do Barcelona de Guardiola. O seu desencontro axiganta a lenda de ambos, e hogano o punta do Milan non malgasta, pero si dosifica o seu talento nun conxunto xeriátrico, á maneira dos rockeiros que, fartos de sexo, drogas e gol, viven de rendas sacando recompilatorios para adultos. Milan e Barcelona enfróntase na fase de grupos da Liga de Campións en encontro retransmitido pola TVG a partir das oito e media do serán.