Cesária Evora, cabaleira da Lexión de Honor de Francia

Programa: 
Músicas e Letras

Coñecida como "A diva dos pés descalzos", título do seu primeiro disco, en 1988, e tamén como "a raíña da morna" -un xénero musical orixinario de Cabo Verde con reminiscencias do fado portugués, o tango arxentino ou a modinha brasileira-, Cesária Évora soe saír descalza ao escenario. É o seu xeito de solidarizarse cos máis desfavorecidos de Cabo Verde, onde naceu en 1941, en Sao Vicente, unha das dez illas dese arquipélago volcánico situado a 500 quilómetros das costas de Senegal.

A cantante foi lanzada á conquista discográfica mundial desde Paris, a principios da década dos 90 do século XX, e os diarios "Liberation" e "Lle Monde" foron os primeiros en falar dela e recoñecela como ilustre membro de "a aristocracia de cantantes de bar".

Desde París tamén, conquistou a gloria internacional en 1992, con "Miss Perfumado", álbum do que se venderon ata o momento máis de 300.000 copias. Cesária Évora, considerada como a voz do pasado dos escravos e a do presente da esperanza en África, premio Grammy en 2004 ao mellor álbum de "world music" contemporánea, foi en 2007 candidata aos Premios Príncipe de Asturias da Concordia e das Artes.

O pasado marzo sufriu un infarto cerebral que detivo temporalmente a súa carreira, renovada este mes de decembro coa publicación de "Radio Mindelo", álbum-libro que reúne unha veintena de temas que ela interpretou na súa mocidade, na década dos anos 60 do século XX.